Á næsta aðalfundi félagsins verður kosið um tvo meðstjórnendur og varamann þeirra. Framboðsfrestur rann út miðvikudaginn 30. mars og eftirfarandi félagsmenn gefa kost á sér. Með því að smella á virku tenglana við nafn hvers frambjóðanda má nálgast kynningu á þeim. 

Í aðalstjórn:
Guðbjörg Guðmundsdóttir

Í aðalstjórn og til vara í varastjórn:
Anna Guðjónsdóttir
Ingibjörg Salóme Sigurðardóttir
Sigrún Valdimarsdóttir

​Upplýsingar um fyrirkomulag kosninga verða kynntar samhliða auglýsingu um aðalfund.

Við kynnum með ánægju nýjan ritstjóra Sáms félagsblaðsins okkar en Linda Björk Jónsdóttir tekur við af Svövu Björk Ásgeirsdóttur sem hefur sinnt starfinu undanfarin ár með ágætum.
Við bjóðum Lindu velkomna til starfa og þökkum Svövu jafnframt kærlega vel unnin störf í þágu félagsins og Sáms á síðustu árum.
​Netfang ritstjóra blaðsins er samur@hrfi.is

Hér eru nokkur orð frá nýjum ritstjóra Sáms um fyrri störf og framtíðarsýn. 
Ég heiti Linda Björk Jónsdóttir og hef tekið við því verkefni að vera ritstjóri Sáms, tímariti Hundaræktarfélagi Íslands. Ég er búin að eiga íslenska fjárhunda í um 23 ár og hefur hundalífið verið ansi stór partur af tilverunni alveg síðan ég var barn í sveitinni hjá ömmu og afa. Ég hef setið í stjórn Deildar Íslenska fjárhundsins (DÍF og verið virkur þáttakandi í starfi félgasins og á sýningum sem hringstjóri, ritari og svo auðvitað sýnandi. Bjó um tíma í Danmörku þar sem ég lærði “multimedia design and communication”. Hundarnir mínir tveir á þeim tíma, feðgarnir Orri og Hökki komu að sjálfsögðu með svo ég fékk að kynnast hundaheiminum í Skandinavíu líka þar sem ég nýtti tækifærið og ferðaðist með hundana á hundasýndasýningar. Í dag búa með okkur feðgarnir Ch. Kersins Hökki og Ch. Sunnusteins Einir, en Eini hefur gengið mjög vel á hundasýningum í gegnum tíðina. Síðan árið 2013 hefur umbrotið á tímaritinu verið í mínum höndum og mér hefur fundist mjög gaman að fá að taka þátt í þessu mikilvæga verkefni sem Sámur er.
Núna er komið að tímamótum í lífi Sáms, því núna stígur Sámurinn skref inn í nútímann og fer á netið í vefsíðuformi. Stefnan er að halda úti lifandi vefsíðu allt árið. Það eru því spennandi tímar framundan.

Þá fer árið að byrja með glæsibrag! Norðurljósasýningin okkar fer fram nú um helgina í reiðhöll Spretts í Kópavogi (Samskipahöllin).
Við skulum ganga vel um flotta sýningarsvæðið og vera hundaeigendum til fyrirmyndar. Nú hefur samkomutakmörkunum verið aflétt en minnum sýningargesti að gæta að sjálfsögðu að persónulegum sóttvörnum sem fyrr.

Dómar hefjast kl. 9 (nema einn hringur á sunnudag) og úrslit áætluð kl. 15:30 báða dagana – Dagskrá, PM og dagskrá úrslita má finna hér.
Veitingasala verður í veislusal hallarinnar. Aðgangur á sýninguna kostar 1.000 kr.
Hlekki fyrir sýningaskrá, umsagnir og úrslit má finna inn á Hundavefur.is, undir sýningar og þar er hægt að velja um úrslit, sýningaskrá eða úrslit í úrslitahring, og velja árið 2022 þar undir. 

Nokkrir punktar sem fara skal yfir fyrir helgina:

• Vinsamlegast keyrum hægt í hesthúsahverfinu - mikið var um of hraðan akstur á svæðinu á sýningunni í nóvember
• STANGLEGA BANNAÐ er að vera með hunda á reiðstígum ásamt því að leggja á reiðstígum eða við hesthúsin í hverfinu, næg bílastæði eru við höllina og nóg pláss til að viðra hundana, ásamt pissusvæði innan dyra við ingang.
• Hundar eru ekki velkomnir upp í stúku eða í veislusal þar sem veitingasala er.
• Hundur á sýningasvæði skal vera í stuttum taumi og tryggt að hundur sé ávallt undir stjórn ábyrgðaraðila hans. Hundar mega ekki vera í útdraganlegum taumi.
• Þeir sýnendur sem eru með SNYRTIBORÐ með sér þurfa að vera með undirbreiðslu undir borðið. Til dæmis má nota teppi, handklæði eða plastundirbreiðslu.
• Hirða þarf upp eftir hundinn INNI OG ÚTI og þrífa með þess tilgerðum áhöldum. Pokar, sótthreinsisprey og pappír er sem fyrr að finna m.a. á borðum við hringi. Við hvetjum fólk til þess að tryggja það að ræsta hundana ÁÐUR en komið er inn í höll og benda öðrum þátttakendum á að hirða upp eftir sína hunda fari það fram hjá þeim.
• Haldið svæðinu í kringum ykkur hreinu.​ Með samstilltu átaki getum við sýnt og sannað að við getum verið til fyrirmyndar þegar kemur að umgengni en vitað er að það er ein helsta gagnrýni á hundahald. Okkur langar ekkert að vera úti í kulda og frosti á vetrarsýningu.
• Dæmt verður í 7 hringjum báða daga og hefjast dómar kl. 9, að undanskildum einum á sunnudegi sem hefst kl. 9:30. Verður hvorum degi skipt upp í tvö holl, fyrir og eftir hádegi, þar sem síðara holl hefst kl. 13:00.
• Veitingasala verður á staðnum í veislusalnum frá kl. 9-16 ásamt því að miðasalan og rósettusalan verða á sínum stað. Aðgangur kostar 1.000 kr. 
• Við minnum félagsmenn á þau ákvæði í reglugerð nr. 80/2016 er varðar velferð gæludýra þegar valdir eru sýningartaumar og ólar. Félagið hvetur félagsmenn til að nýta sér búnað sem er í samræmi við ákvæði reglugerðarinnar.

Sýningastjórar eru Guðný Rut Isaksen, Erna Sigríður Ómarsdóttir, Anna Guðjónsdóttir og Ágústa Pétursdóttir.
Við hlökkum til að sjá ykkur og halda þessa fyrstu sýningu ársins! Gangi ykkur vel og munum persónulegar sóttvarnir.