​Ný löggjöf FCI samþykkt

Á auka aðalfundi FCI í Brussel í dag voru samþykkt ný lög og reglur samtakanna.  Löggjöfin er afrakstur vinnu vinnuhóps innan samtakanna sem stofnaður var 2015 vegna óánægju nokkurra landa innan samtakanna, þar á meðal allra NKU landanna.  Jörgen Hindse formaður danska Hundaræktarfélagsins var formaður starfshópsins en NKU löndin áttu auk hans einn fulltrúa í hópnum.  Tillögur starfshópsins hafa nú verið ræddar í nokkurn tíma og voru í dag þann 15. ágúst samhljóða samþykktar á auka aðalfundi samtakanna.  Um er að ræða fjórar meginbreytingar á regluverki samtakanna:

1. Velferð:  Tilgangi og markmiði samtakanna er breytt með tilliti til velferðar hunda.
2. Kerfisbreytingar:  Breytingar eru gerðar á svæðisskiptingu samtakanna.  Þá er stofnuð aganefnd (gerðardómsnefnd) sem ætlað er að beita viðurlögum ef aðildarfélög brjóta í bága við reglur og lágmarkskröfur samtakanna.
3. Nútímavæðing:  Reglurnar eru nútímavæddar, sér í lagi reglur um starfshætti stjórnar sem gerir nú kleift að nýta betur tækni til fundarhalda.
4. Gagnsæi:  Nýtt regluverk gerir ráð fyrir aukinni upplýsingagjöf um ákvarðanatöku til aðildarafélaga.  

Nýtt regluverk var samþykkt í dag og mun taka gildi þegar það verður birt sem er ráðgert innan þriggja mánaða.