Á morgun, fimmtudaginn 1. mars, gefst hundaeigendum og öðrum gæludýraeigendum kostur á að ferðast með dýrin sín í strætisvögnum. Hundaræktarfélag Íslands, Dýraverndunarsamtök Íslands, Astma- og ofnæmissamfélag Íslands, heilbrigðisnefndir og starfsmenn Strætó koma öll að verkefninu sem er tilraunaverkefni til eins árs. Það þarf vart að taka fram að HRFÍ fagnar þessu frábæra tækifæri fyrir hundaeigendur og vonar að allir leggist á eitt að sýna ábyrgð í verki.
Eins og gefur að skilja verða eigendur dýranna að fara eftir ákveðnum reglum en í þeim kemur meðal annars fram að eigendur dýra eiga að greiða gjald fremst í vagninum og fara svo inn um miðdyr vagnsins eða aftari. Með þessu er farþegum með astma og/eða ofnæmi og þeim, sem hræddir eru við hunda, tryggt hreint svæði í fjarlægð frá dýrunum.
Aðrar reglur má finna hér fyrir neðan.
Hundaræktarfélag Íslands þakkar Strætó fyrir samstarfið og vonast til að verkefnið verði til þess að auka umburðarlyndi gagnvart hundum enn frekar í borginni.

Norðurljósasýning HRFÍ verður haldin helgina 2.-4. mars í reiðhöll Fáks í Víðidal, en þar munu rúmlega 800 hundar mæta í dómhringi.

Föstudagskvöldið 2. mars verður hvolpasýning HRFÍ og Royal Canin sem hefst kl. 18.00. Þar munu 155 hvolpar keppa um titilinn "Besti hvolpur sýningar" í tveimur aldurs flokkum, 3-6 mánaða og 6-9 mánaða.
Keppni ungra sýnenda hefst kl. 17 en þar eru 19 ungmenni skráð til leiks. Dómari í þeirri keppni verður Rebecca Govik (Svíþjóð).

Alþjóðleg sýning fer svo fram laugardag og sunnudag en þar verða samtals  652 hundar sýndir í dóm. Dómar munu hefjast kl. 9.00 báða daga og verður dæmt í fjórum hringjum á laugardeginum og fimm hringjum á sunnudeginum. Dómarar sýningar eru Göran Bodegård (Svíþjóð), Tiina Taulos (Finnland), Tuire Okkola (Finnland), Rui Oliveira (Portúgal) og Sóley Ragna Ragnarsdóttir (Ísland).

Hér fyrir neðan má sjá dagskrá hringja á sýningunni - ATH. að þessi dagskrá er birt með fyrirvara um breytingar á röðun tegunda inn í hring.

Hér er hægt að sjá dagskrá hringja á sýningunni.

Þær gleðifréttir bárust á dögunum að Strætó bs. hafi fengið heimild til að fara af stað með tilraunaverkefni sem gerir hundaeigendum kleift að ferðast með hundana í strætó.  En bann er við því í reglugerð um hollustuhætti sem ráðherra hefur nú gefið tímabundna undanþágu á. 

Undanfari þess að undanþágan var veitt er talsverður og mikil vinna hagsmunaðila liggur að baki. Í starfshópi sem settur var á stofn af Strætó árið 2016 sat meðal annars formaður Hundaræktarfélagsins en hópurinn skilaði af sér niðurstöðum þar sem skilgreind var umgjörð tilraunaverkefnisins. Hópurinn vann verkið út frá sjónamiði um að almenningssamgöngur verði raunverulegur valkostur sem fararmáti innan höfuðborgarsvæðisins og styðji við grænan lífstíl. Umsagnir bárust frá öllum helstu hagsmunaðilum ss. Landlæknisembættinu, Matvælastofnun, Læknafélaginu, Heilbrigðisnefndum á höfuðborgarsvæðinu, trúnaðarmönnum hjá Strætó ofl. og voru þær að mestu jákvæðar í garð verkefnisins.

Undanþágan var veitt með nokkrum skilyrðum og eru nokkur þeirra talin upp hér;

1. Framkvæma skal könnun áður en verkefnið hefst meðal farþega og vagnstjóra og jafnframt verður viðhorf kannað þrisvar sinnum á meðan verkefni stendur. Einnig verður framkvæmd lokakönnun eftir að tilraunaverkefninu lýkur.
2. Hundar og kettir sem skráðir eru í viðkomandi sveitarfélögum eru heimilaðir í vagna sem og nagdýr, fuglar, kanínur, froskar, skrautfiskar, skriðdýr og skordýr sem heimilt er að halda á Íslandi.
3. Farþegi sem náð hefur 18 ára aldri má ferðast með gæludýr og ber hann ábyrgð á dýrinu.
4. Gæludýr skulu vera aftast í vagninum og greiðir sá sem ferðast með gæludýr fargjald en fer síðan inn um aftari dyr vagnsins.
5. Gæludýr eiga að vera í töskum eða búrum, en einnig má ferðast með hund í ól eða beisli. Ekki má ferðast með gæludýr í útdraganlegum taumi.
6. Einungis má ferðast með eitt gæludýr í einu.
7. Ekki má ferðast með gæludýr á milli 7-9 að morgni eða á milli kl. 15-18 að eftirmiðdegi.

Það að hundar geti bráðlega ferðast með eigendum sínum í almenningssamgöngum er afar jákvætt skref þar sem hundaeigendur geta þá nýtt sér valkost um t.d. bíllausan lífsstíl og eykur þetta einnig sýnileika hunda í samfélaginu. Ábyrgð þeirra sem nýta sér þennan valkost á meðan tilrauninni stendur er því nokkur og hvetjum við hundaeigendur sem munu nýta sér þennan valkost til að virða þær reglur og skilyrði sem settar eru til að upplifunin verði jákvæð fyrir alla.