Þá er komið að fyrstu sýningu ársins og stærstu sýningu frá upphafi! Norðurljósasýningin fer fram um helgina, 29. febrúar – 1. mars, í reiðhöll Fáks í Víðidal. Sýningin er alþjóðlegsýning. Fjöldi sölu- og kynningabása verða á svæðinu!
Þetta er stærsta sýning frá stofnun félagsins en alls eru 889 hundar skráðir sem keppa yfir helgina auk 29 ungmenna sem keppa í keppni ungra sýnenda á laugardeginum í hring 6. Dómar hefjast kl. 9:00 í dómhringjum og er áætlað að úrslit hefjist kl. 14:30 á laugardag og kl. 15:00 á sunnudag. 
Dómarar helgarinnar verða: Bo Skalin (Svíþjóð), Harry Tast (Finnland), Levente Miklós (Ungverjaland), Ligita Zake (Lettland), Marie Callert (Svíþjóð), Tatjana Urek (Slóvenía) og Tracey Douglas (Írland). Theodóra Róbertsdóttir dæmir keppni ungra sýnenda.
Myllumerki (e. hashtag (#)) helgarinnar er #nordurljosasyning2020.
​
Dagskrá og PM má finna hér

Umsagnir, sýningaskrá og úrslit má nálgast hér:
Umsagnir: https://www.hundeweb.dk/udstilling-resultat/udstilling/200261?session_locale=en_GB
Sýningaskrá: https://www.hundeweb.dk/udstilling-katalog/udstilling/200261/?session_locale=en_GB
Niðurstöður úr úrslitahring: https://www.hundeweb.dk/udstilling-resultat/udstilling/200261/storering
Umsagnir og úrslit birtast samstundis en ath. að sýningaskrá opnast ekki fyrr en klukkustund áður en sýningin hefst.

Minnum félagsmenn og gesti á að passa umgengnina yfir helgina og biðjum við ykkur að hafa eftirfarandi í huga:

1. Hundar eru EKKI leyfðir í áhorfendastúku eða anddyri Reiðhallarinnar.
2. Hundur á sýningasvæði skal vera í stuttum taumi og tryggt að hundur sé ávallt undir stjórn ábyrgðaraðila hans. Hundar mega ekki vera í útdraganlegum taumi.
3. Þeir sýnendur sem eru með SNYRTIBORÐ með sér þurfa að vera með undirbreiðslu undir borðið. Til dæmis má nota teppi, handklæði eða plastundirbreiðslu.
4. Hirða þarf upp eftir hundinn INNI OG ÚTI og þrífa með þess tilgerðum áhöldum. Pokar, sótthreinsisprey og pappír er sem fyrr að finna m.a. á borðum við hringi. Við hvetjum fólk til þess að tryggja það að ræsta hundana ÁÐUR en komið er inn í höll og benda öðrum þátttakendum á að hirða upp eftir sína hunda fari það fram hjá þeim.
5. Gúmmíkústar verða staðsettir við hringina, þeir eru tilvaldir til þess að sópa hár af teppum. Hikið ekki við að grípa í kúst og haldið svæðinu í kringum ykkur hreinu.
6. Með samstilltu átaki getum við sýnt og sannað að við getum verið til fyrirmyndar þegar kemur að umgengni en vitað er að það er ein helsta gagnrýni á hundahald. Okkur langar ekkert að vera úti í kulda og frosti á vetrarsýningu.

Við óskum öllum góðs gengis og skemmtunar! Hlökkum til að byrja sýningarárið með félagsmönnum!

Lokað er á skrifstofu föstudaginn 28.02.2020 vegna sýningar félagsins en einnig verður skrifstofan lokuð mánudaginn 02.03.2020. 
Hægt er senda okkur tölvupóst á hrfi@hrfi.is en póstur telst móttekinn þann dag sem hann berst. Pappírum er hægt að ýta undir hurðina í Síðumúla 15.
Gotskráningar teljast mótteknar þann dag sem gögn og greiðsla berast. Hægt er að leggja inn á reikning félagsins en reikningsnúmerið er: 515-26-707729 Kt. 680481-0249 gjaldskrá má sjá hér: Gjaldskrá    

Stjórn félagsins sendi eins og þekkt er umsögn til Atvinnu- og nýsköpunarráðuneytisins um drög að reglugerð um innflutning hunda og katta.  Umsögnin er liður í áralangri baráttu félagsins fyrir endurskoðun á reglum um einangrun hunda.  Í framhaldi umsagnarinnar var félaginu boðið að koma til fundar í ráðuneytinu.  Herdís Hallmarsdóttir, formaður og Guðbjörg Guðmundsdóttir, varamaður í stjórn fóru á fund í ráðuneytinu fimmtudaginn síðastliðinn og funduðu með Lindu Fanney Valgeirsdóttur lögfræðingi og Kjartani Hreinssyni dýralækni.  Í framhaldi fundarins fengu fulltrúar félagsins send ný drög að reglugerð um innflutning hunda og katta og eins um einangrunarstöðvar. Í beinu framhaldi sendi stjórn nýja umsögn til ráðuneytisins sem er að finna hér að neðan.  Að einhverju leyti var tekið tillit til athugasemda félagsins en öðru ekki að svo stöddu.
 
Stjórn félagsins fagnar þeim áfangasigri að einangrun færist niður í 14 sólarhringa úr fjórum vikum og tekur það gildi frá og með 1. mars n.k. Er það stórt framfaraskref við innflutning og er að sama skapi lyftistöng fyrir hundarækt hér á landi. Síðast en ekki síst er það mun minna álag á dýr að sæta tveggja vikna einangrun en fjögurra vikna.
 
En betur má ef duga skal!  Enn eru atriði sem stjórn telur að skoða þurfi betur. Útfrá áhættumatinu fæst ekki betur séð en að gæludýravegabréf ætti að nægja sem sóttvörn, sér í lagi vegna flutnings hunda frá Norður Evrópu. Og meðan stjórnvöld telja einangrun að einhverju leyti nauðsynlega ættu tíu dagar að duga eins og þekkist í Ástralíu og Nýja Sjálandi. Að sama skapi er óskiljanlegt hvers vegna eigendur mega ekki heimsækja dýrin sín meðan á einangrun stendur.  Því er verk eftir óunnið í einangrunarmálum og mun félagið halda áfram að vinna þeim málum brautargengi.  

Hundaræktarfélag Íslands mun standa fyrir námskeiði fyrir ræktendur og aðra áhugasama um ræktun með Anne-Chaterine Ancan Edoff frá Svíþjóð helgina 14. og 15. mars nk. kl. 9.30-16.00. Athugið að námskeiðið fer fram á ensku.
Verð er 15.000 kr. fyrir félagsmenn en 30.000 kr. fyrir aðra. Innifalið í verði er hádegisverður og snarl. Námskeiðið fer fram í Krikaskóla, Mosfellsbæ.
Skráning fer fram í síma 588-5255 eða á skrifstofu HRFÍ og þarf að greiða námskeiðsgjaldið til að tryggja pláss. Athugið að takmarkaður fjöldi kemst að. Síðasti skráningardagur er miðvikudagurinn 11. mars.
Á námskeiðinu mun Anne fara í gegnum ýmsa þætti er við koma ræktun hunda.
Þessir þættir eru meðal annars:
- Uppruni hundsins
- Ræktunarmarkmið og erfðir
- Lykilatriði hins fullkomna hunds
- Erfðagallar og kröfur um heilbrigðisathuganir
- Lykilatriði í fækkun vandamála tengdum erfðum
- Skyldleikaræktun
- Vinsælir undaneldisrakkar
- Fjölskyldutengsl
​
Við vonumst til að sem flestir nýti sér þetta frábæra tækifæri!

Hér er stutt kynning á Anne:
Anne kynntist hundaheiminum fyrst árið 1967 þegar hún eignaðist Schäfer. Hún byrjaði að rækta tegundina ásamt eiginmanni sínum árið 1976 og stóðu hundarnir sig vel, bæði á sýningum og í vinnu. Aðrar tegundir sem þau hafa átt, ræktað og unnið með eru Amerískur cocker spaniel, Pointer og Norfolk terrier.
Hún hefur dæmt á sýningum um allan heim en árið 1989 fékk hún dómararéttindi á Schäfer. Í dag dæmir hún allar tegundir í tegundahópum 1 og 5 ásamt fjölmörgum tegundum í tegundahópum 2, 7 og 8.
Anne er matsmaður í skapgerðarmati hjá sænska hundaræktarfélaginu (SKK). Einnig hefur hún starfað sem hundaþjálfari og séð um menntun hundaþjálfara fyrir SKK. Hún hefur verið með fjölmörg námskeið fyrir SKK, bæði fyrir ræktendur og hinn almenna félagsmann.