Vegna takmarkanna við landamæri Íslands í tengslum við Covid 19 faraldurinn getur félagið ekki staðið fyrir augnskoðun sem fyrirhuguð var 2.-5. september næstkomandi. Augnskoðuninni verður því frestað þar til aðstæður leyfa framkvæmd hennar. Þeir sem þegar hafa bókað tíma í augnskoðun hvort sem er á Akureyri eða í Reykjavík eiga áfram tímann og því forgang þegar hún verður haldin. Hægt er að bóka tíma í augnskoðun á skrifstofu félagsins.

​Í ljósi aðstæðna ákvað stjórn því að veita ræktendum áframhaldandi svigrúm er varðar augnvottorð. Telur stjórn ekki hægt að krefjast augnskoðunar að viðlagðri kæru til siðanefndar á þeim tíma sem ekki er hægt að bjóða uppá augnskoðun. Séu undaneldisdýr notuð til ræktunar án þess að þau hafi verið augnskoðuð eða með of gamalt augnvottorð verða ættbækur engu að síður gefnar út og ekki verður send inn kæra til siðanefndar.
Það er fortakslaust skilyrði að ræktandi mæti strax með dýrið í næstu augnskoðun sem félagið mun standa fyrir og eigi bókaðan tíma þegar sótt er um ættbækur. Mæti dýrið ekki verður án tafar málið sent til meðferðar siðanefndar auk þess sem afkvæmin verða sjálfkrafa sett í ræktunarbann. Svigrúmið gildir um þau got þar sem pörun átti sér stað eftir síðustu augnskoðun félagsins sem haldin var 6.-7. febrúar síðast liðinn.

​Stjórn vill áfram árétta að ræktun án heilbrigðisskoðana er alfarið á ábyrgð ræktenda sjálfra og treystir þvi að ræktendur sýni áfram sem hingað til ábyrgð í ræktun og hafi í heiðri velferð og heilbrigði dýranna.

Á næstu dögum ættu sýningargjöld að berast til félagsmanna. Skráningargjald er endurgreitt að fullu að frádregnum 5% sem fellur til vegna kostnaðar við skráninguna og félagið þarf að greiða. Við vonum að félagsmenn sýni þvi skilning og biðlund þar til endurgeiðsla hefur borist. Spurningum eða öðrum athugasemdum vegna endurgreiðslu skal beina til skrifstofu á netfangið hrfi@hrfi.is
​

Þetta eru ótrúlegir tímar, en nú þremur dögum eftir síðustu ákvörðun stjórnvalda, voru kynntar nýjar sóttvarnarreglur er varða sýnatöku við landamæri og sem gilda eiga frá og með 19. ágúst n.k. Þær fela í sér að allir þeir sem koma til landsins þurfa að fara í tvær sýnatökur með 4ra til 6 daga sóttkví á milli. Engu máli skiptir hvaðan fólk er að koma og hve lengi það ætlar að dvelja á landinu. Þessi ákvörðun útilokar erlenda dómara sem ætluðu að koma til landsins og dæma á sýningunum 22.-23. ágúst n.k. og voru tilbúnir að leggja ýmislegt á sig í því skyni fyrir okkur félagsmenn. Við drögum hins vegar línuna við að setja þá í nokkurra daga sóttkví og játum okkur sigruð.

Okkur þykir því leitt að þurfa að tilkynna að sýningar félagsins sem halda átti þann 22. og 23. ágúst nk. þarf að fella niður af óviðráðanlegum orsökum.

Stjórn félagsins hefur ákveðið að endurgreiða sýningagjöld að fullu, að frádregnum kostnaði vegna skráningar, eins fljótt og hægt er og nú kemur sýningakerfi DKK vonandi að góðum notum þar sem endurgreiðsla vegna heillar sýningar er byggð inn í kerfið. Við vonumst því til að greiðslur berist hratt og örugglega inn á þau kort sem notuð voru til að skrá.

Á þessar tvær sýningar voru skráðir annars vegar 829 hundar og hins vegar 827, auk keppni ungra sýnenda báða daga. Væntingar allra stóðu til þess að hægt væri að aðlaga sýningaformið að gildandi sóttvarnarreglum eins og systurfélög okkar t.d. í Noregi og Danmörku hafa gert. Samráð var haft við Almannavarnir, aðgerðarsvið lögreglunnar á höfuðborgarsvæðinu ásamt því að rætt var við MAST og töldum við okkur hafa fundið leiðina með þeim breytingum á sýningaforminu sem áður voru kynntar. Það er því ljóst að þetta er mikið högg fyrir starfsemi félagsins og óvíst er um framhaldið, en þrjár stórar sýningar hafa þá verið felldar niður það sem af er árinu. Næsta stóra sýning er Winter Wonderland sýningin þann 28.-29. nóvember. Það er innisýning sem vinnur ekki endilega með okkur. Við tökum stöðuna vegna hennar síðar á árinu en vonum það besta.
Stjórn vill jafnframt þakka sýningarstjórn og starfsfólki skrifstofu fyrir lausnamiðaða og góða vinnu í þessu sambandi. 

​Nýjar sóttvarnarreglur gera áfram ráð fyrir að takmörkun á fjölda einstaklinga sem kemur saman miðist við 100 fullorðna og áfram verður sú regla að hafa beri a.m.k. 2 metra á milli einstaklinga nema þar sem ekki er hægt að tryggja slíka fjarlægð, þá skal bera andlitsgrímu.
Sóttvarnarlæknir hefur í leiðbeiningum sínum til almennings lagt áherslu á að aðilar máti starfsemi sína innan gildandi reglna og finni leiðir til að lifa með þeim, enda séu þær líklega komnar til að vera um eitthvert skeið.
Það verður áskorun að halda tvær 800 hunda sýningar þann 22. og 23. ágúst n.k. en sýningastjórn félagsins hefur unnið að því undanfarna daga að setja upp skipulag sem rúmast innan sóttvarnarreglna. Stjórn félagsins fundaði í gærkvöldi með sýningastjórn og ákvað í framhaldi að halda sýningarnar með breyttu sniði.  Ákveðið var að gefa þeim félagsmönnum sem þess óska tækifæri á að afskrá hunda sína og fá endurgreiðslu á sýningagjöldum, þó að frádregnum áföllnum kostnaði vegna skráningar.
 
Breyting á fyrirkomulagi sýningar: 

• Sett verða upp þrjú sóttvarnarsvæði, hvert  með 3-4 dómhringjum. Stranglega bannað verður að fara á milli sóttvarnarsvæða.
• Einn aðili má fylgja hverjum hundi inn á sóttvarnarsvæði. Sérstakur inngangur og útgangur verður á hverju svæði. Fylgst verður með fjölda á hverju svæði og gætt að hann fari ekki umfram 100.
• Sýningunni verður skipt niður í "holl" innan hvers sóttvarnarsvæðis, þannig að dómur hefst á hverju svæði á tilteknum auglýstum tíma í hverju „holli“. Á milli "holla" verður hvert sóttvarnarsvæði rýmt og borð og aðrir snertifletir sótthreinsaðir áður en hleypt er inn í næsta "holl".
• Virða skal 2 metra reglu eins og kostur er en að auki skulu allir sýnendur bera andlitsgrímu í dómhring.
• Mælst er til þess að ekki sé mætt með hunda á sýningasvæði fyrr en skömmu áður en "holl" þeirra á að byrja.
• Þá er mælst til þess að sýningasvæði sé yfirgefið eins fljótt og hundur hefur lokið dómi, þannig að fólk safnist ekki saman utan sóttvarnarsvæða að óþörfu.
• Engin veitingasala verður á svæðinu.
• Ekki verður leyft að tjalda á svæðinu, en þátttakendur mega koma með búr og fyrirferðarlitla stóla inn á sóttvarnarsvæði.
• Engin BIS hringur verður og þar af leiðandi engin stærri úrslit verða haldin. Eingöngu verða úrslit í hverri tegund fyrir sig í dómhringjum.
  ​

Vegna ferðatakmarkanna hefur orðið mikil breyting á auglýstum dómurum en í dag miðast áætlun við eftirfarandi 9 dómara:
Charlotte Høier (Danmörk), Jussi Liimatainen (Finnland), Laurent Heinesche (Luxemborg), Mikael Nilsson (Svíþjóð), Tino Pehar (Króatía), Þorbjörg Ásta Leifsdóttir (Ísland), Sóley Halla Möller (Ísland), Daníel Örn Hinriksson (Ísland) og Viktoría Jensdóttir (Ísland). Þau Barbara Müller og Svein Bjarne Helgesen duttu nýverið út.
 
Vegna þessa liggur fyrir að áður auglýstir dómarar á tegundir koma til með að breytast. Sýningastjórn vinnur nú að því að koma saman dagskrá sem gengur upp með öllum þeim breytum sem liggja fyrir, en ekki verður unnt að birta hana fyrr en um miðja næstu viku.
 
Stjórn félagsins og sýningastjórn sýna því fullan skilning að faraldur af völdum kórónuveirunnar hefur breiðst út undanfarið með hópsýkingum sem getur hafa breytt afstöðu þátttakenda til sýningahalds frá því að skráningu á sýningarnar lauk. Vill stjórn félagsins því koma til móts við félagsmenn sem treysta sér ekki til að mæta og taka þátt af sóttvarnarástæðum. Til að koma til móts við þessa aðila, gefst eigendum skráðra hunda tækifæri til að AFSKRÁ HUNDA SÍNA á sýningarnar og fá sýningagjöld endurgreidd, að frádregnum kostnaði vegna skráningar (500 kr.). Ekki er hægt að velja úr skráðum hundum, heldur gildir afskráning um alla skráða hunda viðkomandi á báðar sýningar. Beiðni um slíkt skal senda í tölvupósti á hrfi@hrfi.is frá og með deginum í dag og fram til miðnættis sunnudaginn 16. ágúst. Ekki verður tekið við beiðnum í gegnum síma.
Í tölvupóstinum þarf eftirfarandi að koma fram:

• Nafn eiganda
• Ættbókarnöfn eða númer hunda (hægt að senda afrit kvittunar úr DKK kerfinu)
• Bankaupplýsingar (reikningsnúmer og kennitala)

Eftir þann tíma verður ekki gerð breyting á skráningum. Endurgreiðsla getur tekið allt að 1-2 mánuði.
 
Í upphafi næstu viku ætti þá endanlegur skráður fjöldi hunda á sýningarnar að liggja fyrir og hægt að ljúka skipulagi á dagskrá sem verður birt eins fljótt og kostur er.
 
Við vonum að félagsmenn virði viljann fyrir verkið, sýni breytingunum skilning og taki þátt í því með okkur að gera þetta að ánægjulegum viðburði þar sem öllum reglum og fyrirmælum stjórnvalda um sóttvarnir er fylgt. Við treystum á góða samvinnu við félagsmenn sem eins og alltaf eru lykillinn að því að hægt sé að halda úti starfsemi á vegum félagsins. Félagið hefur leitað til almannavarna og óskað eftir fundi um skipulag sýningar. Fyrirkomulag sýningar getur því breyst enn frekar ef fram koma ábendingar.