Nú er komið að alþjóðlegu haustsýningunni okkar sem fer fram dagana 8. - 9. október í Samskipahöll Sprettara í Kópavogi. Á laugardag eru áætlaðir tegundahópar 1, 4, 5, 6, 8 og 10 ásamt keppni ungra sýnenda en á sunnudag eru áætlaðir tegundahópar 2, 3, 7 og 9. Dómarar helgarinnar verða: Christine Rossier (Sviss), Marja Kosonen (Finnland), Markku Kipinä (Finnland), Patric Ragnarson (Svíþjóð), Pirjo Aaltonen (Finnland), Stephanie Walsh (Írland) og Svend Løvenkjær (Danmörk). Dómari keppni ungra sýnenda verður Erna Sigríður Ómarsdóttir.

Skráning er hafin á Hundavef og lýkur fyrri skráningarfresti þann 4. september kl 23:59 og lokast alfarið fyrir skráningu þann 11. septmeber kl 23.59, eða fyrr ef fyllist á sýninguna. 
Gjaldskrá 1: sunnudagurinn 4. september, kl. 23:59
Gjaldskrá 2: sunnudagurinn 11. september, kl. 23:59
Ef fólki vantar tæknilega aðstoð er það hvatt til að skrá tímanlega, ekki er veitt tæknileg aðstoð eftir kl. 16 á föstudögum. Ekki er veitt aðstoð við skráningu eftir að skráningafresti á sýninguna lýkur.
Athugið að hámarksfjöldi skráninga er 1150 skráningar og lokar skráningakerfi sjálfkrafa þegar, og ef, þeim fjölda er náð. Það gæti því gerst fyrir tilgreindan lokatíma skráningarfrests.
Umsóknir um meistaratitla, ættbókarskráningar, eigendaskipti, umskráningar á erlendum ættbókum, þurfa að hafa borist félaginu ásamt öllum viðeigandi gögnum og greiðslu Í SÍÐASTA LAGI ÞRIÐJUDAGINN 30. ÁGÚST til þess að tryggja að skráning náist.

Skráningar á sýningar HRFÍ fara fram í gegnum hundavefur.is en einnig er hægt að skrá á skrifstofu HRFÍ á sérstökum skráningarblöðum gegn aukagjaldi til og með 30. ágúst. Skrifstofa HRFÍ er opin þriðjudaga til fimmtudaga frá kl. 10-15. Ekki er tekið við skráningum sem berast eftir síðasta skráningardag.

Til þess að geta skráð þarf eigandi/eigendur hunds sem skráður er á sýningu HRFÍ að vera virkur félagsmaður, með greitt árgjald, í HRFÍ, eða félagi viðurkenndu af HRFÍ, það ár sem sýningin fer fram. Ef eigandi hefur ekki greitt félagsgjald skal hafa samband við skrifstofu HRFÍ til að ganga frá greiðslu á því áður en skráð er á sýningu. Hundar skráðir á sýninguna með íslenska eigendur skulu vera skráðir í HRFÍ. Aðrir hundar verða að vera skráðir hjá öðrum hundaræktunarfélögum samþykktum af FCI. Skráning og greiðsla þarf að hafa borist félaginu áður en síðasta skráningardegi lýkur.

Ekki er hægt að millifæra fyrir sýningagjöldum í vefskráningum og skráningar eru ekki teknar gildar ef greiðsla fylgir ekki.

Dómaraáætlun fyrir sýningar félagsins má nú nálgast HÉR

Nú um helgina, 20.-21. ágúst, verður seinni útisýning sumarsins haldin á Víðistaðatúni í Hafnarfirði. Skráning á sýninguna gekk frábærlega en skráðir eru 1.140 hundar sem munu etja kappi á þessari Norðurlanda sýningu.
Allir dómhringir byrja kl. 9:00 báða daga og áætlað að úrslit hefjist kl. 15 á laugardag en kl. 15:30 á sunnudag. Gera má ráð fyrir að þau standi til u.þ.b. kl. 17:30/18.

Dómarar helgarinnar verða: Annette Bystrup (Danmörk), Arvid Göransson (Svíþjóð), Henric Fryckstrand (Svíþjóð), Jussi Liimatainen (Finnland), Laurent Heinesche (Lúxemborg), Massimo Inzoli (Ítalía), Sjoerd Jobse (Svíþjóð), Tiina Taulos (Finnland) og Viktoría Jensdóttir (Ísland).
​
Keppni ungra sýnenda fer fram á laugardeginum og dómari verður Sjoerd Jobse. Að þessu sinni eru 24 ungmenni skráð. Keppnin hefst kl. 10 í úrslita hringnum við brekkuna.

Hér er hægt að sjá dagskrá og PM (dagskrá hringja)
Úrslit, umsanig og sýningaskrá má finna á hundavefur.is

Uppsetning sýningar fer fram á föstudeginum 19. ágúst. Ekki verður heimilt að tjalda á túninu fyrr en uppsetningu er lokið og leyfi hefur verið veitt, það er áætlað kl. 17 en gæti orðið seinna. Vinsamlegast athugið að tjöld við sýningarhringi mega ekki vera stærri en 3m x 3m og þau verða að vera staðsett minnst 4 metrum frá sýningahringjum. Stærri tjöldum má tjalda fjarri sýningarhringjum.

Við minnum á að umgengni um svæðið þarf að vera til algjörrar fyrirmyndar og hvetjum við félagsmenn til að nýta sér ruslafötur á svæðinu. 
Vinsamlega athugið að ​lausaganga hunda á svæðinu er stranglega bönnuð og skulu allir hundar vera í taumi og á eru þeir alfarið á ábyrgð eigenda sinna. 
​Við minnum félagsmenn á þau ákvæði í reglugerð nr. 80/2016 er varðar velferð gæludýra þegar valdir eru sýningartaumar og ólar. Félagið hvetur félagsmenn til að nýta sér búnað sem er í samræmi við ákvæði reglugerðarinnar.

Vinsamlegast skoðið myndina hér að neðan hvar má tjalda, en fyrirkomulagið er breytt frá því sem áður var.
Skipulag svæðisins og hringja má sjá hér að neðan. Bendum á að myndin er ekki í réttum hlutföllum, en hún sýnir grófa yfirsýn á svæðinu. 

Framkvæmdastjóri félagsins er í tímabundnu leyfi frá störfum fyrir félagið af persónulegum ástæðum.

Silja Ösp Jóhannsdóttir, starfsmaður skrifstofu, tekur við ákveðnum verkefnum framkvæmdastjóra. Stjórn félagsins fer í fjarveru framkvæmdastjóra með starfsmannamál félagsins.

Ráðið hefur verið í tímabundna stöðu á skrifstofu félagsins.

Á meðan starfsfólk skrifstofu aðlagast nýjum störfum fyrir félagið biðjum við félagsmenn um að sýna þeim skilning og þolinmæði.

Vinsamlegast beinið erindum ykkar til eftirfarandi eftir því sem við á:
​
Silja Ösp Jóhannsdóttur, verkefnastjóri, silja@hrfi.is 
Maríanna Gunnarsdóttir, gjaldkeri stjórnar, gjaldkeri@hrfi.is
Skrifstofa HRFÍ, hrfi@hrfi.is
Stjórn HRFÍ, stjorn@hrfi.is

Kveðja,
Stjórn HRFÍ

​Minnum félagsmenn á augnskoðunina sem verður næstu daga. Hundar skráðir í skoðun á Reykjavíkursvæðinu  mætta uppí Sólheimakot (sjá leiðarlýsingu hér: http://www.hrfi.is/soacutelheimakot.html). Hundar skráðir á Akureyri eiga að mæta í skoðun í verslun Gæludýr.is - Baldursnesi 8, 603 Akureyri ( Ja.is kort )
​
Tíma þíns hunds er að finna á kvittuninni sem send var við greiðslu. Vinsamlega virðið tímasetningar. 

Augnskoðunin verður rafræn og niðurstöður verður að finna á Hundavef í beinu framhaldi. Sjá leiðbeiningar um  skráningu á Hundavef.is hér. Minnum fólk á ganga vel um kotið okkar og svæðið í kring.

Byrjað verður að skrá í næstu augnskoðun 15. ágúst. Hún verður eingöngu haldin á höfuðborgarsvæðinu dagana 14.-15. október.  

Listi yfir tíma: ATH. hundarnir eru skráðir eftir ættbókarnafni.

Stjórn HRFÍ hefur ákveðið að senda fé úr Minningarsjóði Emilíu (Millusjóðnum) til stuðnings hundeigenda í Úkraínu. FCI heldur utan um sjóð sem greiðir til hundaræktarfélags Úkraínu sem síðan sér um að koma vistum til þeirra sem á þurfa að halda.

Minningarsjóður Emilíu er styrktarsjóður og er hlutverk hans að styrkja málefni heimilislausra hunda. Tekjur sjóðsins eru framlög vegna minningarkorta, frjáls framlög einstaklinga og fyrirtækja. Árlegt framlag Hundaræktarfélags Íslands og vextir af höfuðstóli. Stjórn sjóðsins úthlutar styrk/styrkjum 8. ágúst ár hvert.

Við hvetjum því alla sem málið er skylt, hundavini sem aðra, að leggja þessu góða málefni lið.

Reikningsnúmer sjóðsins er: 515-14-608600, kt. 680481-0249 senda þarf staðfestingu á greiðslu á gjaldkeri@hrfi.is.