Stjórn HRFÍ samþykkti nýverið reglur fyrir rallý hlýðni keppnir og ætla þær Silja Unnarsdóttir og Þórhildur Bjartmarz að halda kynningu á þessari skemmtilegu vinnu með hunda fyrir áhugasama.
 
Kynningin fer fram sunnudagskvöldið 10. september n.k. og hefst kl. 20 í húsnæði félagsins að Melabraut 17. Heitt verður á könnunni og kynningin opin öllum sem hafa áhuga.
​
Vonumst til að sjá sem flesta!

Nánar um nýju rallý hlýðni reglurnar má sjá HÉR.

Í ljósi þeirrar óánægju sem við höfum fundið fyrir varðandi breytingu á Hundavef (skráning á hundum í eigu annarra á sýningar), hefur verið ákveðið að draga breytinguna til baka, a.m.k. um sinn. Við munum skoða hvort við finnum aðrar leiðir til að takmarka aðgang óviðkomandi að skráningum og eiga frekara samtal við félagsmenn um hvað er ásættanlegt.
​
Takk fyrir að láta okkur vita!
Stjórn og skrifstofa

Ákveðnar breytingar hafa verið gerðar á Hundavef í tengslum við skráningar á sýningar félagsins og deilda. Núna geta skráðir eigendur einungis skráð hundana sína á sýningar í gegnum Hundavef. Þetta er gert til að tryggja að skráðir eigendur hafi greitt félagsgjald þar sem mikil vinna skrifstofu hefur ferið í að fara yfir þessa hluti og einnig svo að eigandi sé ábyrgur fyrir skráningunni á hundinum sínum á viðburðinn. 
Ýmsar þróanir eru í prófun núna á vefnum sem við hlökkum til að kynna fyrir ykkur á næstunni! 

Nú um helgina, 12.-13. ágúst, verður síðari útisýningar helgi sumarsins haldin á Víðistaðatúni í Hafnarfirði. Skráning á sýningarnar gekk vel og eru rúmlega þúsund hundar skráðir yfir helgina. Að þessu sinni verður keppni ungra sýnenda bæði laugardag og sunnudag, en á laugardag eru skráðir 32 ungir sýnendur og á sunnudag 26. Allir dómhringir byrja kl. 9:00 báða daga og áætlað að úrslit hefjist kl. 15:00 báða daga. Gera má ráð fyrir að þau standi til u.þ.b. kl. 17.

Dómarar helgarinnar verða: Åke Cronander (Svíþjóð), Dagmar Klein (Rúmenía), Hans Van den Berg (Holland), Jari Partanen (Noregur), Paula Rekiranta (Finnland), Rui Oliveria (Portúgal) og Tomas Rohlin (Danmörk).
​
Hér er hægt að sjá dagskrá og PM (dagskrá hringja)
Vekjum athygli á skemmtilegum dagskrálið sem verður haldinn báða daga í úrslita hringnum milli kl 10 og 11:30, en það er innkallsþraut og eru allir hundar velkomnir! Sjá nánar hér.
Úrslit, umsagnir og sýningaskrá má finna á hundavefur.is
​
​Uppsetning sýningar fer fram á föstudeginum 11. ágúst. Ekki verður heimilt að tjalda á túninu fyrr en uppsetningu er lokið og leyfi hefur verið veitt, það er áætlað kl. 18. Ekki er heimilt að keyra inn á túnið á föstudeginum, né um helgina. Vinsamlegast athugið að tjöld við sýningarhringi mega ekki vera stærri en 3m x 3m og þau verða að vera staðsett minnst 4 metrum frá sýningahringjum. Stærri tjöldum má tjalda fjarri sýningarhringjum. ATH. Vinsamlegast ekki tjalda of nálægt göngustígunum, það þurfa stórir bílar að geta keyrt stíganna alla helgina, tjöld sem eru of nálægt gæti þurft að fjarlægja ef þau eru fyrir.

​Nóg er af bílastæðum og eru þau sem næst eru merkt inn á myndina hér að neðan en þau dreifast á nokkur svæði í kringum túnið. Bannað verður að leggja fyrir framan Skátahúsið svæði F og bannað er að leggja á túninu sjálfu. Við biðjum félagsmenn að gæta að því að leggja ekki í íbúastæði eða ólöglega. Yfirlit yfir bílastæði má sjá hér að neðan, hægt er að smella á myndirnar til að sjá þær stærri.
Salerni er á svæðinu, nóg af ruslafötum en einnig er ruslagámur og flöskusöfnun fyrir skáta á svæðinu. Félagsmenn eru hvattir til að ganga vel um svæðið og gæta að því að hreinsa upp eftir hundana ásamt því að hirða eftir sig allt rusl. Mjög gott tjaldsvæði er á túninu ef fólk vill gista en skátafélagið Hraunbúar sjá um og reka tjaldsvæðið.  Svæðið er vaktað yfir nóttina en Hundaræktarfélag Íslands tekur enga ábyrgð á verðmætum sem kunna að vera skilin eftir. 

Gestum gefst kostur á að kynnast hundum og ræða við hundaeigendur, ræktendur og sýnendur. Félagið verður einnig með rósettur af öllum stærðum og gerðum til sölu til að fagna góðum árangri.

​Hlökkum til að sjá ykkur!
(Smellið á myndirnar til að sjá þær stærri)