Sámur tók símaviðtal við Pekka Olson sem staddur var hér á landi á dögunum.
Pekka er dýralæknir og formaður sænska hundaræktarfélagsins.
Hver er skoðun þín á einangrunarmálum hunda á Íslandi? 
,,Í rauninni lýsir yfirlýsingin frá okkur í NKU minni persónulegu skoðun á þessu máli. Í dag, árið 2018, er tækni, mótefni og lyf í dýralæknafræðum orðin það mikil og þvílíkar framfarir hafa átt sér stað í þessum vísindum frá því árið 2003. Það kæmi mér því verulega á óvart ef niðurstaðan verði óbreytt staða í einangrunarmálum á Íslandi. Ég skil ekki hvers vegna t.d. gæludýravegabréf ættu ekki að virka fyrir ykkur eins og fyrir önnur lönd í heiminum. Það er tími til kominn að stjórnvöld hlusti og skilji um hvað málið snýst“.
​
Pekka er sjálfur menntaður dýralæknir og hefur starfað sem slíkur í fjölda ára. Hann segist vera undrandi á þankagangi íslenskra dýralækna í þessu máli. ,,Tímarnir hafa sannarlega breyst – ég skil ekki þankaganginn í þessu máli“. Ísland hafi ekki verið að glíma við alvarlega sjúkdóma líkt og hundaæði eða hundafár, það séu hér færir dýralæknar og eigendur sem taka ábyrgð á heilbrigði sinna dýra og hugsi vel um þau. Bólusetningar séu góðar og burt séð frá því þá getum við ekki einangrað litla Ísland þótt við vildum. Á sínum tíma hafi parvóvírus smitast um heiminn á einu ári. ,,Það voru ekki hundar sem voru smitberarnir í því alvarlega tilviki – heldur mannfólkið sjálft“.
Einnig nefndi Pekka að hann skildi ekki hvers vegna fólk sem ætti dýr í einangrun mætti ekki heimsækja það á einangrunartímanum. Það væri hæglega hægt að koma því við undir eftirliti. Það væru réttindi dýrsins að eiga möguleika á því að líða sem best á meðan þessari vist stæði. ,,Oft á tíðum er verið að flytja inn unga hunda, jafnvel hvolpa. Þeir eru á viðkvæmasta skeiði ævi sinnar þar sem mikil þörf er á samskiptum við eigendur og umhverfisþjálfun. Ég sé ekki hvaða rök eru þarna að baki“. Verði niðurstaðan sú að einangrun sé áfram nauðsynleg hér á landi sagðist Pekka óska þess að hún yrði eins stutt og mögulegt er og eigendum yrði þá heimilt að heimsækja dýrin sín.
Við þökkum Pekka kærlega fyrir spjallið.
Texti: Svava Björk Ásgeirsdóttir, ritstjóri Sáms

​Hér má svo sjá sameiginlega yfirlýsingu NKU landanna

Á nóvembersýningu HRFÍ, ár hvert eru afreks- og þjónustuhundur ársins heiðraðir. 
Leitað er eftir tilnefningum í þessa samkeppni.  Með tilnefningunni þarf að fylgja frásögn um hundinn og góðverk hans ásamt öðrum nauðsynlegum upplýsingum s.s. nafn hans, aldur, nafn eiganda, nafn sendanda, o.s.frv. 
​
Ekki eru gerðar kröfur um að hundurinn sé hreinræktaður og allar tilnefningar eru vel þegnar jafnvel þó langt sé um liðið.  Til að taka þátt í vali um afrekshund ársins þarf hundurinn með einhverjum hætti að hafa komið að björgun manna og/eða dýra, liðsinnt fötluðum eða veikum einstaklingum eða verið til uppörvunar og hjálpar á einn eða annan hátt.  Margar frásagnir eru til af hetjudáðum „besta vinar mannsins” sem hafa snortið hjörtu okkar. 
Undir heitið þjónustuhundur ársins tilheyra þeir hundar sem vinna allan ársins hring að þjónustu í samfélaginu. Þar má nefna lögreglu- fíkniefna- toll- björgunarhunda o.s.frv. 
Tilnefningar skal senda með pósti til skrifstofu HRFÍ, Síðumúla 15, l08 Reykjavík eða með tölvupósti, netfang: hrfi@hrfi.is 

Skilafrestur rennur út 9. nóvember 2018
Á myndunum má sjá afrekshund ársins 2017, Svarthamars Högnu og þjónustuhund ársins 2017 Samson

Þann 15. október á 19. fundi 149. löggjafarþings lagði Þorgerður Katrín Gunnarsdóttir, þingmaður eftirfarandi spurningar fyrir sjávarútvegs- og landbúnaðarráðherra:

1. Hvernig miðar vinnu við nýtt áhættumat fyrir íslensk stjórnvöld vegna innflutnings hunda og katta ?
   
2. Hyggst ráðherra innleiða svokallaðan gæludýrapassa, eða gæludýravegabréf, sem hefur verið tekinn upp í flestum Evrópulöndum, og heldur utan um þau skilyrði sem uppfylla þarf svo flytja megi gæludýr milli landa?
   
3. Telur ráðherra að líta eigi til annarra landa, t.d. Ástralíu og Nýja-Sjálands, þar sem dýr sæta 10 daga einangrun með mismunandi strögum skilyrðum eftir því hvaðan þau koma ?
   
   

Svar Kristjáns Þórs Júlíussonar, sjávarútvegs- og landbúnaðarráðherra, var á þá leið

1. Vinnan við áhættumatið stendur enn yfir, verkið er unnið af Dr. Preben Willeberg sem er fyrrverandi yfirdýralæknir Danmerkur.  Upphaflegar vonir stóðu til að skýrsla um þessi efni yrði tilbúin í apríl á þessu ári, en við vinnuna hafi komið í ljós að verkið er töluvert umfangsmeira en upphaflega hafi verið gert ráð fyrir.  Íslenskir sérfræðingar hafa lagt fram gögn og aðstoðað Dr. Willeberg í sinni vinnu og að nú standi vonir til að skýrsla um þetta efni liggi fyrir á árinu og eigi síðar en í árslok. 
   
2.  Niðurstöðu áhættumatsins sem í vinnslu er á að nýta sem grunn til frekari skoðunar á þessum svokölluðu gæludýravegabréfum að því að honum skilst.
   
3. Við vinnuna við áhættumatið verður m.a. litið til framkvæmda og reynslu annarra ríkja og þeirra lausna sem þau hafa gripið til í vörnum gegn dýrasjúkdómum.  Það á að kanna hvort unnt sé að stytta sóttkvíartíma í einhverjum tilfellum, m.a. með hliðsjón af nýjum rannsóknaraðferðum sem hafa verið þróaðar.  Að þvi leyti til er eðlilegt að líta m.a. til annarra landa, svo sem Ástralíu og Nýja Sjálands. 

 
Þorgerður þakkar svör sjávarútvegs- og landbúnaðarráðherra og hvetur hann til að halda sínu fólki við efnið svo hraða megi áhættumatinu sem mest.  Þá bendir hún á að framþróun hafi orðið í dýralækningum, í lyfjum og slíku og að þeir sjúkdómar sem verið er að verja landið fyrir sé í mörgum tilfellum orðið hluti af staðabólusetningum hunda og katta eða það er afar auðvelt að greina þá með prófunum.  Það sé hægt að breyta þessu fyrirkomulagi í þágu dýranna okkar, í þágu dýraverndar og ekki síður í þágu okkar mannfólksins.   Þá bendir Þorgerður Katrín á að ekki hafði verið tekin nein vísindaleg ákvörðun varðandi þá niðurstöðu að fara með einangrunina úr sex mánuðum í þrjá og síðan úr þremur mánuðum í 4 vikur.    Það hafi orðið framþróun í vísindum, hvort sem mönnum líkar betur eða verr og ekki hægt lengur að beita fyrir sig gamaldags einangrunarsjónarmiðum þegar um er að ræða innflutning á gæludýrunum okkar.  Reglurnar sé hægt að endurskoða án þess að verið sé að ógna öryggi dýra, manna eða umhverfis.
 
Hægt er að horfa á umræðurnar á vef alþingis, eða lesa þar umræðurnar í heild: https://www.althingi.is/altext/upptokur/lidur/?lidur=lid20181015T163930